Ligazóns
Historia
Inicio do Centro
Foi unha tarde do mes de outubro de 1893 cando Dona Vicenta Rodríguez Cachada entregou ao notario un gran sobre pechado, dicíndolle que era o seu testamento. Dous meses despois, tras o seu pasamento, abríase o sobre na Casa Consistorial da Guarda ante a expectación dos veciños da vila.
Dona Vicenta era viúva e o seu único fillo morrera moi novo en Porto Rico, polo que a súa vida estaba entregada á piedade e á caridade. Era ben coñecida por todos pola súa xenerosidade.
A súa herdeira universal foi a Madre Dolores Pallés de San Estanislao, provincial de Vitoria da congregación de HH Carmelitas da Caridade, e o testamento establecía que aqueles bens debían empregarse na fundación dun colexio na vila da Guarda, no que recibisen educación gratuita as nenas pobres da localidade, podendo admitirse alumnas internas e externas de pago.
A noticia espallouse rapidamente pola localidade: “A Guarda tería un colexio para nenas, doado por Dona Vicenta”. Así, o 20 de marzo de 1894 chegaban á Guarda as Irmás Carmelitas, instalándose inicialmente na casa da súa benefactora. Na casa do Cruceiro comezaron o seu apostolado, convertindo en oratorio o cuarto no que Dona Vicenta entregara o seu testamento e exhalara o seu último suspiro.
A Madre María Mensa e as Irmás Cristina, Josefa, Paz e Querubín foron as primeiras mestras, e xa no mes de abril, as dependencias da casa estaban ateigadas de alumnas gratuitas e de pago, aínda que sen admitir todavía internas por falta de local.
Mentres isto sucedía, avanzaban os traballos de construción do novo colexio, no que todavía sen rematar, empezarían as clases o 5 de xullo de 1896.
O labor das Irmás foi dende un principio moito máis aló do estritamente ducacolelgioantiguosanxosetivo: trataban de solventar as necesidades da vila, axudaban a moitas persoas sen recursos, púñanse á disposición das autoridades para o que fixese falta… Sirva como exemplo o seu labor ante a gravísima epidemia de gripe do ano 1918, evitando os perigos do contaxio, mérito recoñecido publicamente nunha carta do Concello.
Foron 85 os anos de dedicación e entrega á mocidade da Guarda neste primeiro colexio San José no que se sucederon moitas xeracións. Pero o centro facíase pequeno e non respondía ás necesidades e esixencias da educación, polo que houbo que buscar outro solar no que construír un colexio máis funcional e moderno. En setembro de 1980 inaugúrase o actual edificio e, un ano máis tarde, as canchas e patios exteriores.
Comeza a súa andadura con dezaoito Irmás na comunidade, das cales doce forman parte da Comunidade Educativa, xunto a cinco profesores seglares que colaboran no labor académico.
Na actualidade, o número de vocacións é menor e, como consecuencia, hai menos Irmás no colexio, pero a pesar diso, o obxectivo segue sendo permanecer aberto ás necesidades do contorno e acompañar os alumnos, ao par das súas familias, na súa formación, transmitindo valores como a alegría, o traballo, o respecto, a solidariedade…
Dende 1894 o labor das irmás continúa, poñendo o seu gran de area na FORMACIÓN E EDUCACIÓN de moitas xeracións da nosa vila, A Guarda.
